أجمل إحساس

من كام يوم كنت بتابع برنامج القاهره اليوم وكانوا مستضفين ناس بيتكلموا عن مشروع بنك الطعام وازاى اننا نحافظ على الاكل اللى باقى عندنا واللى زياده عن احتياجنا ونوزعه على الناس اللى محتاجاه ؛الكلام دا أثر فيا اوى ورجعنى لايام انا بعتبرها من اجمل الايام فى حياتى هى كانت مدتها 3سنين ؛فى الفتره دى كنت بشارك مع مجموعه شباب وبنات فى جمعيه للاعمال الخيريه وكانوا مجموعه ناس من اجمل واحسن الناس اللى قابلتهم على مدار حياتى كلهم ناس فعلا نفسها تعمل حاجه وكانت حياتهم ماشيه عمل وعباده ومافيش حاجه جايه على التانيه او مقصرين فى العباده لصالح العمل او العكس كله متوازى مع بعضه وعندهم فكر حلو اوى واهداف عايزين يحققوها ؛فى الجمعيه دى كنا بنجمع تبرعات من الناس اللى مش عارفه توصل للناس المحتاجه وكنا مقسمين نفسنا مجموعات علشان نعمل ابحاث وندور على الاسر المحتاجه ونبدأ الشغل فى جمع التبرعات والابحاث دى من شهر رجب يعنى زى الايام دى استعدادا لرمضان ولازم نكون مجهزين كل مكونات الشنطه الرمضانيه قبل رمضان بيوم او اتنين ؛واجمل احساس لما تعمل شىء وتحس ان ربنا راضى على الشىء دا وفى نفس الوقت بدخل فرحه على قلب انسان مسلم فى ايام ربنا بيحبها ومفضلها ؛بتحس انك بتعمل الحاجه اللى ربنا خلقك علشانها من مساعدة اخ ليك فى الاسلام ودى طبعا عباده زى ماقال رسولنا الكريم عليه افضل الصلاه والسلام (لايؤمن احدكم حتى يحب لاخيه مايحبه لنفسه )وانك بتحاول تصلح فى الارض احنا مجموعه الشباب والبنات ماكناش غير وسيله ربنا استخدمنا فيها علشان نوصل الحاجات دى ودى نعمه كبيره جدا وكان دعائنا دايما (اللهم استخدمنا ولا تستبدلنا )وفرحه الناس بيك وانت رايح توصل لهم الامانه اللى ربنا بعتها لهم اد ايه الاستقبال بتاعهم بيكون حلو وانهم يعزموا علينا اننا نفطر معاهم ؛ومن ضمن الحاجات اللى كانت جمعيتنا كمان بتعملها كنا بنجمع الادويه اللى موجوده فى بيوتنا اللى لسه صالحه واللى الناس عايزة تتبرع بيها وكان عندنا قسم اسمه صيدليه الجمعيه ونشوف لو حد من الاسر دى محتاج دواء والدواء دا موجود فى الصيدليه كنا بنوصله ليه طبعا تحت اشراف دكاترة مختصين واللى محتاج يكشف كان فى اتفاق مع بعض الدكاتره ان الكشف يكون مجانى لبعض الحالات وكان معانا كمان اخصائى بصريات للى محتاج نظاره نظر ؛كان المكان سبحان الله مليان خير وحب ورحمه كلنا كلن شعارنا واحد وهدفنا واحد وهو ارضاء ربنا ورسوله وشعارنا كان (ومن احياها فكأنما احيا الناس جميعا ) وكان من ضمن الحاجات اللى بنعملها فى رمضان اننا نتفق مع دار الايتام علشان نروح نفطر مع الاطفال اللى فيها فى يوم وكل حد فينا يعمل اللى هو عايزة وناخده ونروح للدار كنا بنكون راحين علشان نحسس الاولاد انهم مش لوحدهم احنا معاكم واللى كان بيحصل هو العكس من مقابله الاطفال وحبهم وحنانهم وانهم فرحانين بيك اكتر منك وانك تقعد مع مجموعه منهم وتحكى لهم حكايات وقصص الانبياء وتعلمهم دعاء ليله القدر وتعمل بينهم مسابقه اللى هايحفظ الدعاء ليه جايزة وتعرف اخبارهم وانا عن نفسى ليا مواقف كتيرر جدا مع الاولاد فى الدار دى هابقى احكيها فى مرة تانيه لانها بجد تستاهل ؛ارجع لجمعيتى اللى عمرى ماهانسى ايامى فيها ولا ايامنا مع بعض انا فاكره اول سنه بدأنا الجمعيه دى كان برنامج عمرو خالد (بأسمك نحيا )هو اللى بيتذاع فى رمضان دا وكنا كل يوم نتناقش فى الحلقه ونتكلم عن اسماء الله ويوم حلقه اسم الله الفتاح انا مش بنسى اليوم دا والله كان عندنا عجز فى الارز فى مخزن الجمعيه ومش موجود الا كرتونه زيت واحده ومش كان فيه فلوس ومش عارفين نعمل ايه ومش معقول الشنط تقف لان لسه فى أسر كتير محتاجه الشنط دى وكان معانا بنت فى الجمعيه عندهم ارض واهلها عايزين يطلعوا زكاه الارض دى وكانت الزكاه طبعا ارز واحنا قعدين متجمعين فى الجمعيه وبدعى ربنا يفتحها علينا والله لاقينا الارز الناس مطلعينه على السلم ممكن يكفينا لاخر الشهر وفى نفس الوقت جه تليفون لحد معانا فى الجمعيه ناس بيتبرعوا بمبلغ مالى كده كمان فلوس الزيت جت وبدأنا شغل من تانى وكل دا بفضل ربنا علينا وثقه الناس فينا . والله العظيم من اجمل الاحاسيس اللى ممكن تحسها فى حياتك انك تحاول تساعد حد وانك تدخل الفرح على قلبه وقلب ولاده اللى ممكن يكونوا الاطفال دول يتامى او والده تعبان تعب خطير ؛وساعتها هاتحس بالرضى فى حياتك كلها وهاتحمد ربنا على نعمه علينا انا بدعى ربنا ان جمعيتنا ترجع تانى ونشتغل من جديد وربنا يبعد عننا كل وحش لانهم بجد اجمل ناس عرفتهم وبحترمهم جدا جدا جدا وباقولهم شكرا على كل حاجه حلوة حسينا بيها مع بعض وباشكر ربنا قبل كل شىء علشان استخدمنى وعارفنى على الناس دى وحسيت إن الدنيا لسه بخير لسه فى ناس بتفكر فى غيرها مش فى نفسها بس . ودا رقم تليفون بنك الطعام للى يحب يشارك فيه 16060كلح حد ممكن يشارك يكلم الرقم دا ويشوف اقرب مكان مناسب ليه فين وازاى يقدر يفيد الناس دى سواء بمجهود مادى او معنوى ؛وبجد فى البرنامج حصل حاجه فرحتنى اوووووووووووووى واحد اتصل واتبرع بمبلغ 10مليون جنيه لبنك الطعام ربنا يعز امه الحبيب المصطفى اللهم امين بحبكم اوى وحبوا بعض لحد المره الجايه