تمر الايام الايام سريعا وكلها كام يوم ونبعد عن بعض وينتهى الارتباط الذى كان بيننا واستمر 25 عاما هو كل عمرى الماضى وسوف ابدأ حياه جديده من دونك وبعيد عنك لم تعد تشاركينى افراحى ولا احزانى ولاابتساماتى ولا دموعى نعم سوف اعيش بدونك وسوف اتذكر ايامى معك وحياتى التى مرت بوجودك ؛
سوف اتركك خلال ايام قليله وانتقل الى مكان اخر ليس لى فيه ذكريات مثل ذكريات ولا افراح مثل الافراح التى عشتها فيك ؛نعم سوف اتركك يابيتى الغالى بيتى الذى ولدت فيه وتربيت فيه ولعبت وفرحت وحزنت فيه وانتقل الى مكان لااعلم له اى ملامح ولا يربطنى به اى شىء سوى انه بيتى الجديد ؛سوف افتقدك وافتقد جيرانك سوف افتقد جدرانك ودرجات السلم فيك وذكرياتى مع ولاد عمى وضحنا ولعبنا ودموعنا وخوفنا وحنانا على بعضنا البعض ؛وهم الان لم يعدوا موجودين ايضا كل حد ذهب لحاله وشغلته الحياه ولكننا عندما نجتمع نتذكر كل ما كان بيننا من ذكريات جميله ولما كنا زعل من بعض ونضرب بعض وبعد كل هذا نجتمع مع بعض على الاكل وننسى اننا كنا زعلنين من بعض
لن انسى اجتماع العيله كلها من اعمام وعمات واولاد الاعمام والعمات فى اول يوم من شهر رمضان وفطارنا فى وقت واحد وصلاه التراويح مع بعض وقبل الفطار اجتمعنا نحن الصغار امام فوازير عمو فؤاد وبوجى طمطم وبكار مؤخرا ؛وكان اليوم يعدى جميل ونفضل على ذكرى هذا اليوم طوال الشهر الكريم ؛احساس بيت العيله بيكون ليه معنى جميييييييييل جدا بتحس بالامان وبالحب وان فى ناس فى ظهرك لو حصلك اى مكروه وهتلاقى حد واقف معاك فى دنيتك ؛بس للاسف دوام الحال من المحال كل حد بتاخده الدنيا وبيبعد ممكن يكون البعد دا غصب عنه وممكن يكون بارادته بس الانسان لما بحاول انه يعيش لوحده وبعيد عن عيلته بيضعف وسهل اوى انه يكسر بس دا بقى حال الدنيا
ارجع تانى لبيتنا الجميل ممكن يكون مش اجمل بيت فى الدنيا بس انا شايفاه كده لانه عاش معايا لحظات مافيش حد تانى عاشها معايا بيتنا دا اللى ربيت فيه خوخه (السلحفه بتاعتى ) ولعبنا مع بعض وعرفت عنى كل اسرارى لانى كنت بحكى مع خوخه كل حاجه لو فرحانه بقولها انى فرحانه واحكى لها السبب ولو زعلانه ومخنوقه بعرفها بردوا ومش كانت بتاكل الا من ايدى لانها كانت مدلعه شويه ومش بتاكل الا لما ادلعها وكانت اوقات كتير بتشاركنى خروجاتى وكنت بفسحها واعرفها المكان اللى احنا فيه كانت العلاقه بينا غريبه خوخه كانت بتحس بيا وبنفسيتى وبتحس اذا انا فرحانه ولا مكتئبه كنت بحس انى فيا صفات كتير منها زى السكون والتأنى وان الزحمه بتزعجنى خوخه لما كانت بتحس بزحمه وان فى ناس كتير كانت بتدخل القوقعه بتاعتها وبتفصل نفسها عن العالم اللى حواليها كنت بحبها اوى ؛ولما سابتنى وماتت انا مش قدرت استوعب انها ماتت واقولها يلا بقى بطلى هزار واطلعى اوعى تكونى موتى بس الحقيقه انها سابتنى وماتت اتمنى انى مش اكون قصرت معاها فى الاكل والشرب او فى يوم اكون نسيتها من غير قصد .
وفى بيتنا غرفتى يااااااااااااااااااااااااااه عليها مش عارفه انا هابعد عنها ازاى دا اكتر مكان انا قضيت فيه جزء كبير جدا من عمرى ؛الغرفه دى اللى كنت بجتمع فيها انا واصحابى وكنا بنضحك ونهزر ونذاكر ؛دى فيها كل اسرار اصحابى واسرارى ؛ياما كتير اتكلم فيها وفضفض وهى بتسمع كل حاجه وكانت نعم الصديق اللى بيسمع ولا بيتكلم ؛غرفتى انا بعشق كل حته فيها كل ركن من اركانها هواها نورها وكمان فيها( تويتى )دبدوب دا كان هديه من امل صحبتى ومن اكتر الهدايا اللى بحبها جدا لانى بموت فيه وكمان امل وهى راحه تشتريه ليا قالتلى تعالى اختارى اجيب ليكى ايه هديه قولت لها انا عايزة تويتى استغربت من طلبى اوى بس جابته ليا ومن اعز الهدايا اولا لانه من امل اللى بحبها اوى وكمان لانه تويتى صديقى الصدوق اللى مستحمل هبلى وعصبيتى ومستحمل منى كل حاجه وبيسمع كل اللى عايزة اقوله من غير ماينطق ولا كلمه بس بيريحنى لما بكلمه وبفضفض معاه .هاتوحشنى وصله النت اللى كانت مطلعه عينى ودايما كنت ببعت لصاحبها وقوله بجد حرام النت وحش عندى ويرد ازاى دا شغال تمام طيب لما يكون وحش عارفينى بس وانا هاتصرف وطبعا ولا بتصرف ولا غيره ويبقى الحال على ماهو عليه .
هاتوحشنى لمتى انا واصحابى مروة وامل وهبه وايناس ومنار وكلامنا وحكايتنا وذكريتنا ؛وكلامنا عن ايام الجامعه واللى بعد الجامعه وكلام كل حد فينا عن شغله وحياته وطبعا اللى مخطوبين كلامهم وحكاياتهم عن احبابهم
كل ذكرياتى دى كانت هنا فى بيتنا وطبعا غيرها كتيرررررررررررررر اوى بس حكم السن بقى والزهايمر
هاودعك يابيتنا خلال ايام قليله بس عايزاك مش تنسانى وتشهد ليا يوم القيامه انى ذكرت ربنا فيك وانى صليت فيك وقرائتى للقراءان وتعليمى التجويد فيك اتمنى انك تشهد ليا بالخير ؛وانا عمرى ماهنساك ولا هانسى احلى ايام عمرى فيك ؛واتمنى ليا ان البيت الجديد يكون خير عليا انا واهلى ؛عمرى ماهانسى جيرانا هما ساعات كانوا بيخنوقونى بس هايوحشونى كل حاجه هاتوحشنى فيك .
بحبكم اوى وحبوا بعض لحد المرة الجايه
المشاركات
