اهو جه ياولاد

بدأ رمضان شهر الصيام ياترى مين اللى اشترى الفانوس وعلق الشراشيب ؛انا عن نفسى عملت كده بس انا بحب الفاونيس القديمه مش بتاع الايام دى الى بيضحكوا بيها على العيال
كل سنه وكل الناس طيبه وبخير والنهارده الشياطين هاتتسلسل يبقى كده الحمدلله اترحمنا من شياطين الجن عقبال يارب شياطين الانس وربنا يعنا على انفسنا ونطلع من رمضان السنه دى ان شاء الله مغفور لنا ومعتقوين من النار واكثر رحمه بانفسنا وبالناس ؛رمضان بالنسبه للمسلم فرصه ربنا يقدرنا كلنا ونغتنمها ونستغلها صح لان الحسنات فيه مضاعفه والسنه فيه بأجر الفريضه ؛بس استغلال عباده مش استغلال مسلسلات وتليفزيون وست كوم اللى مغرق الدنيا الايام دى وكل البشر طلعين يقولوا انتظرونا فى رمضان واحنا ننتظرهم وهما يضحكوا علينا ويطلعوا يعملوا عمره ويقضوا الشهر فى عباده وصوم وصلاه بالذمه دا كلام ؛احنا بقى السنه دى اللى هانضحك عليهم وهانعمل لنفسنا جدول نمشى عليه طول رمضان علشان نحاسب نفسنا اول بأول ونلحق رمضان قبل مايجرى زى باقى الشهور مابتجرى وكله محسوب من عمرنا ؛ماتيجوا نخلى الهدف بتاعنا السنه دى الجنه والفوز بها (الا ان سلعه الله غاليه )والسلعه دى ياجماعه هى الجنه مين هايقدر على تمنها دى سعرها غالى اوى بس مش مستحيله يعنى ممكن كلنا نوصلها وتكون بيوتنا كلها جنب بعض فى الجنه وجنبنا قصر النبى صلى الله عليه وسلم هاتبقى مع حبيبك المصطفى حد يطول .
اه كلنا كلنا ممكن نطول بس نشتغل ونعمل اللى ربنا امرنا بيه وهو مش كتير لان الدين بتاعنا دين يسر مش عسر يعنى (لايكلف الله نفسا الا وسعها)كل حد بيعمل على اد طاقته وربنا عالم بينا اكتر من علمنا بأنفسنا .
رمضان شهر الرحمه والمغفره والعتق من النار (وسارعوا إلى مغفره من ربكم وجنه عرضها السموات والارض)ياريت كلنا نحاول اننا مش نفسد صيامنا بالغضب وسؤ تصرفاتنا مع الناس وإطلاق البصر وياريت البنات يلتزموا بحجابهم الشرعى علشان مش يكونوا فتنه للشباب ويتحملوا ذنوبهم احنا مش حمل ذنوب زياده ربنا يغفر لنا جميها ؛وبلاش الخيم الرمضانيه اللى ممكن تضيع علينا صيام وتعب طول النهار ويبقى ما استفدتش من صيامى غير الجوع والعطش ؛ماتيجوا نخلى رمضان السنه دى مختلف ونعمل حاجه تفرح ربنا على اد امكانياتنا نتبرع بحاجه بسيطه جدا او نعمل مع اصحابنا مشروع لشنطه رمضان ونجمه ونوزعها على الناس اللى محتاجها يبقى احنا عايزين فى رمضان دا الصحبه الصالحه اللى هاتساعدنا على إننا نغتنم هذا الشهر الكريم .
وفى جدول عاجبنى اوى على موقع الاستاذ مصطفى حسنى الجدول دا اسبوعى علشان نشوف عباداتنا فى رمضان بتزيد ولا بتقل ؛وفى نفس الوقت نحاسب نفسنا اول باول
يعنى حاسبوا انفسكم قبل ان تحاسبوا